ஹஷிம் ஆம்லா ஓய்வு | ஜனவரி 19, 2023

சர்ரே: தென் ஆப்ரிக்காவின் ஆம்லா, அனைத்து வித கிரிக்கெட் போட்டிகளில் இருந்து ஓய்வு பெற்றார்.

தென் ஆப்ரிக்க கிரிக்கெட் வீரர் ஹஷிம் ஆம்லா 39. கடந்த 2004ல் கோல்கட்டாவில் நடந்த இந்தியாவுக்கு எதிரான டெஸ்டில் அறிமுகமான இவர், 2019ல் சர்வதேச கிரிக்கெட்டில் இருந்து விடை பெற்றார். ‘டாப்–ஆர்டர்’ பேட்டரான இவர், 124 டெஸ்ட் (9282 ரன், 28 சதம்), 181 ஒருநாள் (8113 ரன், 27 சதம்), 44 சர்வதேச ‘டி–20’ (1277 ரன், 8 அரைசதம்) போட்டிகளில் 18,672 ரன் குவித்துள்ளார். டெஸ்ட் அரங்கில் ‘டிரிபிள் செஞ்சுரி’ (311 ரன், எதிர்: இங்கிலாந்து, 2012) விளாசிய ஒரே தென் ஆப்ரிக்க வீரர் என்ற சாதனையை தன்வசம் வைத்துள்ளார்.

சர்வதேச ஓய்வுக்கு பின், இங்கிலாந்தில் நடக்கும் ‘கவுன்டி’ போட்டியில் சர்ரே அணிக்காக விளையாடினார். கடந்த ஆண்டு இவர் இடம் பெற்றிருந்த சர்ரே அணி கவுன்டி சாம்பியன்ஷிப் பட்டம் வென்றது. இந்நிலையில் நேற்று, அனைத்து வித போட்டிகளில் இருந்து ஓய்வு பெறுவதாக அறிவித்துள்ளார். இனி, தென் ஆப்ரிக்காவில் நடக்கும் ‘டி–20’ லீக் தொடரில் எம்.ஐ. கேப்டவுன் அணியின் பேட்டிங் பயிற்சியாளராக செயல்பட உள்ளார்.

இதுகுறித்து ஆம்லா கூறுகையில், ‘‘சர்ரே அணிக்காக ஓவல் மைதானத்தில் விளையாடியதை மறக்க முடியாது. இந்த அணியுடனான பயணம் மிகச் சிறப்பானது,’’ என்றார்.